Amerḍil*

Publié par Imeddukal n Jeṛjeṛ sur 29 Février 2012, 13:12pm

Di zzman amezwaru, tella yiwet temɣart, tezdaɣ weḥd-es degg wedrar, ɣur-s yiwet taɣaṭ. Yiwet tikkelt, g waggur n Yennayer, yella-d ugeffur, adfel, akd usemmiḍ. Teḥbes temɣart-nni nettat d taɣaṭ-is aggur kamel gg wexxam-is, ur tufi amek ara d-teffeɣ.

Asmi iffuk waggur n Yennayer, tcerq-ed tafukt, teffeɣ-d temɣar-nni d taɣaṭ-is; tesenduy iɣi, tebda a teṭṭlaqab aggur n Yennayer, teqqar-as :

Xemsa degg wallen-ik

A εemmi Yennayer,

Teffɣeḍ ur texdimeḍ ara !

Dɣa mi i s-yesla waggur n Yennayer, yerfa aṭas fell-as; yezzi ɣer waggur n Furar, yenna-yas :

Ttxil-ek a εemmi Furar,

Reḍl-iyi yiwen degg ussan-ik,

Ad nɣeɣ tamɣart-agi, aqemmuc n lεar !

Irḍel-as Furar yiwen wass degg ussan-is. Imir-en yeččuṛ-ed igenni, yekkat-ed wegris d wedfel, yerna-d waḍu asemmaḍ. Tamɣart tamcumt, yeṭṭef-itt wedfel di beṛṛa, teqqur s usemmiḍ, temmut nettat d taɣat-is. Yerra-d ttar deg-s waggur n Yennayer.

Segg imir-en, aggur n Yennayer yejmeε ass-nni i s-d-yerḍel waggur n Furar, ur as-t- yerra ara. D imi i s-qqaren i wass aneggaru n Yennayer " amerḍil". D imi daɣen ay yesεa waggur n Furar yiwen wass aqell n wagguren nniḍen : ixus-as wass-nni yerḍel i waggur n Yennayer.

Belkassem Bensedira, cours de langue kabyle, Alger, Jourdan, 1887.

* À la mémoire de Dda Mulud At Mɛammar (28/12/1917 - 26/02/1989)